الشاعر ميسرة صلاح
العسلية
من صغرى بحب العسلية
واكمن عيونك عسلية
أنا حبيتك
على باب بيتك
واقف ومسمر رجليه
ونن عنيه
قصقص جناحاتة
فى شباكك
عصفور
و أتمحك فشباكك
مش عايز
حد يطلعني
إنما لو قلبك
يوم باعني
أنا حكبر
على كل مشاعري
وحبطل أكل العسلية
بقـلم ميسرة صلاح الدين
توب الدموع
- بتضييع حلاوة الوصف من عظمة الموصوف-
لما تجود عين الرجال
بتجود في حب المصطفى
ولما تنهد الجبال
لجل العلي اللي أصطفى
يا رب
يا رب بحنى جبهتي
وبحس أنى عليت كتير
و فضعفى بلقى قوتي
والدمع توب ملهوش كبير
وأنت الكبير
ع اللي كبر
واللي فجر
واللي في ليل الخوف غدر
حتى القمر
بيصلى بنجوم السما
وأنت اللي بيك قلبي سما
عن كل أطماع البشر
وأما هويت كنت الهوا
وأما رميت عدلك رمي
بالنور وما يغشى البصر
دا أنا ضعف حبات المطر
لكن قوى
سابح في زمنك وف ساعاتك
وبقلبي يامة قريت صفاتك
ولأني حبيتك لذاتك
لقيتني روح دايبة قوى
ما أنت القوى
ع اللي قوى واللي غوى
واللي على عبادك نوى
يا خالق الطير والنوى
بتسبح الريح والشجر
بيوطى لإيدين الضعيف
اللي مطاله بحكمتك
وأنا إنسْى مليان بالعبر
لكنى طالب رحمتك
يا رب
يا رب بحنى جبهتي
وبحس أنى عليت كتير
بقـلم ميسرة صلاح الدين
شباك خجل
شباك خجلشباك خجل
------------
أشتعل تلج الفراغ
شعر
في عنيكى اللذاذ
الخجل شباك أزاز
من وراه طليت عليكى
لسة بينا خطوتين
حاسة بسخونة المشاعر
و براءة الرغبة
و العشق الصبوح
لسة بينا خطوتين
لؤلؤ الإحساس جموح
والعطور الفايرة بتبوح بحكايات
عن شفا يف الوردة والخد الندى
أشتعل كل المدى
و المسافات اللي بينا أتلونت
بالزقزقة
متذوقة كل الحاجات فعنيه لما بحضنك
بحضن لهيب الشمس
و خصوبة المطر
أرتعش جسم القمر
كل الشبابيك اللي بينا أتفتحت
أقواس قزح
شلال بطعم اللهفة
و بلون الفرح
قلبك طرح
عناقيد عنب
و أنا دقتها
و دوقتها
طعم السعادة الممكنة
رجيت سكون الأمكنة
و ضفرت من جلدك ملاذ
بقـلم ميسرة صلاح الدين
مواسم
وكانت طفولتي فى أخر فصولها
وكانت رجولتي بتعلن وصولها
وكانت عنية على كل حاجة
ورجلي بترمح مع كل سكة
وكانت مشاعري فى أعنف حالاتها
وكانت ملامحي بينطق سكاتها
وأنا كنت أخضر بكل المعاني
ودا يما بصدق كلام الأغاني
ودا يما فى بالى النهاية السعيدة
وبفرح بريحة الهدوم الجديدة
وريحة السيجارة
وريحة البنفسج في قلب العذارى
وبطلب أمارة على كل حاجة
وف عنية حاجة
فىغاية التفرد
و غاية التمرد
و غاية السذاجة
و عمال أرفس فعنق الزجاجة
بعند وتحدى
وبزرع فىوردي
لكل المواسم
وبحضر مراسم وأنا مش فاهمها
و بضحك في غيمها
الحياة لو تغيم
وعايق وقيم
وقيمتي فخيالي اللي جامح لجامه
ودا يما كما البحر ساعة احتدامه
فى حلى ورحالي
وقلمي وعافيتي
يدوب رأسمالي
ومالي قليل
وفى العشق أميل لحد التصافي
وأس أختلافى الفصاحة في شعوري
و بثبت حضوري
و لو بالغياب
بقـلم ميسرة صلاح الدين
الشيزلونج
الغربة كان أحساسى دايما وسطكوا
طب أنتوا كان احساسكوا أيه
كانت عنيه متبته فى الأرض
والصمت كان رغبة وسمه
شجرة مشاعرى بتنتـفض أسرار
لكن مفيش ولا سر ممكن يتوصف
تتساوى عزلة قلبى في كهوف الغياب
بحضوره في جميع الطقوس المعلنة
يعصرنى شبح الأسئلة
بصوابع أخشنت هموم
*******
كل الموانى بشدة ترفض مركبى
كل البحور تطردنى براها بغضب
أول أشارة أبعتها بتطيش في السحاب
أخر أشارة أبعتها مبقلهاش لزوم
ظلمات ورعد وبرق في شراسة الغرق
والموج مغطى الموج وأنا من غير غطا
بستجدى من كل الخرايط حزنها
وأهبد دماغ البوصلة في حيطان الغيوم
أنا بعد ما أستأذن وأقوم
ح أستنسخ الموت البطئ
بقـلم ميسرة صلاح الدين
بيبسى
-أنا مش ح أبرأ نفسى من كره العدا لكن مع العشرة أبتديت أرتاحلهم-
أتقربت جوايا وجهات النظر
كارمن وديزنى ونوكيا
وجيفارا وأخيل
وأغاني من عصر الكليب المرمرى
لشمس الأصيل
يمكن أصادف بنت حلوة
من المجر
مطرب في حانة رخيصة
أو عالم كبير
يمكن أصادف واحدة بياعة هوا
وهوا العصارى ياخدنى للتفكير
يمكن أصادف دانتى والأخوين رايت
أو شخص ثاير مبدأه التكفير
أو حتى أشارك نيتشه خطوات رحلته
بين أيقونات الضحك والتكشير
بعديها أشرب بيبسى مع ناجى العلى
ونبات نفسر عبس والتكوير
مخلوق عجيب جوايا سايب بصمته
أبعاد جديدة لفكرة التنوير
أنا شبهى لكن شبهى أصبح مختلف
ومابين حقيقتى وبينى فرق كبير
أنا بتقسم لحاجات كتيرة صغيرة
جمعها تكسب مج م البرازيـــــــل
بقـلم ميسرة صلاح الدين
