شهيرة كامل

الحل الوطنى

قرر مجلسنا الموقر
برياسة شيخ المنصر
أن اللحمه تمام
وخاليه من المرض
وعشان خاطر عيونكم
هنحلل الحرام
ونسيب الحزام
بس أوعوا تقولوا مره
عاوزين منكم عوض
يلا الخنزير هاتوه
وبسكينه أدبحوه
وهنعمل تلاجات
ليكوا هنا تحطوه
لجل الخواجه يجى
ياكل وينبسط
ومش عاوز لبط
شايف معارضه جايه
ونارها علينا زايده
ورافضين السكات
بيقوالوادا دينكوا مات
ودبيحه زى ديه
ماليها علينا ديه
متحرمه علينا
من فوق سبع سموات
الدين دا مش سياسه
بيكفنا هينظبط
طب وعيالنا الديابه
ال شكل الغلابه
هيكلوا ايه زلط
اهو دا بقه الغط
أحنا عشان الصداقه
وعيون سيدنا الخواجه
حلينا دى القضيه
ساميها بقه شفافيه
ساميها ديمقراطيه
أيه يعنى حرام أتحلل
ماهو دينا عشان عيونكم
راح يبقى معانا أسهل
وعشان خاطر تعبكوا
راح نبنى كعبه جاركوا
وتحجوا بقه بسهوله
وتعيشوا حياه معقوله
وخلوا علينا الاضحيه
وسلملى عل الوطنيه
وحكومتنا المعنيه

بقـلم شهيرة



وحدوووووووووه

وحدووووه
حكمة قالتها وزارة الرحمه
أن وجودك عامل زحمه
وعشان هما عليك بيخافوا
قالوا فى دعوة حب وصدق
أن الموت عليك بقه حق
يلا قوام سلم على أهلك
وأشحت تربه تكون على قدك
واقطع توب يكفى لكفنك
واخترلك بقه موته تناسبك
كيس دم يكون لسه ملوث
او حباية تاريخها مخلص
أو جرعه لدوا مش مترخص
وممكن نستوردلك فايرس
لو تأمر هنبيع الجثه
والمبلغ هيروح للورثة
وبكره يقولوا دا خيركم زايد
أهو كان قاعد
دى الموته جاتلك كده فرصه
يلا قوام ألحق هنخلص
دى عروضنا وأسعارنا الارخص
ليه تفضل فى الدنيا مقرفص
أفرد جسمك جوا فى قبرك
أعدادكم دى راح تتقصقص
وعشان أنت أساسا ميت
ليه شايف ناس واقفه تعيط
وعيالك جايه بتستعبط
ومراتك قاعده بتتنطط
ويقولوا دا كان هو سندنا
و الساهر على بيتنا وقوتنا
روحوا ألهى ما توعوا تعيشوا
بدواكم خربتوا بيوتنا
سيبك منهم
دول عايزينك تبقى حمارهم
تفضل تشقى وتجرى عشانهم
بكره هنقضى على أمراضهم
وعشان أحنا بردة الأحسن
يلا بسرعه قوام عل المدفن
بحقنه هتخلص من أوجاعك
يلا قوام مد لنا دراعك
ولازم تؤمن كده بقضاه
ما هى لا دى عيشه
ولادى حياه
دا علاجنا فى الدنيا نجاه
وما دايم غير وجه الله
وحدووه
لا اله الا الله

بقـلم شهيرة



محتاجة الرد؟؟؟؟؟؟؟؟؟

قولنا هنبنى وادى أحنا بنينا السد العالى
يا أستعمار بنيناه بأدينا السد العالى
غنوة قالوها زمان أجدادنا
وأحنا وراهم كنا نرد
قالوا الخير هيعم بلدنا
والدنيا أديها هتتمد
وبعزة علمنا ولادنا
ازاى قدروا يعدوا الحد
والأخبار كلها قريناها
عن فايدة ونعيم السد
لكن فجأة قريت مانشيت
أصحوا يا عالم
بص وطالع
السد دا عن خيركم مانع
الطمى عن الأرض أتحاش
محاصيلنا بتتباع ببلاش
وبنستورد أكل عيالنا
وركبنا القطر القشاش
والسمك العايم مبقاش
والباقى منه ما يسواش
والنوبه غرقت يا أخونا
وأتاكلت بالمية آثارنا
والمرض الفتاك أهو صابنا
وبقينا فى غرفة أنعاش
وناس بتقول لا كان ولا عاش
أل يقول كلمه على السد
وكفاية الكهربا جبناها
والنوبه وأهلها أو يناها
وأتقلبوا بعد المانشيت
لحكاوى من جذب وشد
دلوقتى محتاجة انا رد؟؟؟؟؟؟؟؟؟؟؟؟؟؟؟؟؟
أحنا علينا لما بنينا
ولا وطينا تحت الأرض
نهتف تانى يحيا العالى
ولا نادى بهدم السد
ونقيم عل بنوه الحد

بقـلم شهيرة



ألبوم صور

زى عادتى
صاحيه بدرى
فتحة شباك جوا اوضتى
كل شىء ساكن مكانه
حتى وردى لسة نايم
لسة مستنى أوانه
جبت قلمى وجبته ورقى
وقهوتى
أصل طبعى
دايما أشربها لوحدى
و بأرادتى
جبت ألبوم ذكريات
شايلة فية عدد كبير من الاهات
ضحكه عاليه
ودمعه جاريه
باقى ألبومى سكات
لما بطله فجأه مات
مات حقيقى جوا منى
لما قرر وبأرادته
يكسر الاحلام بصمته
كان فاكرنى هشتريه
لا واعيش كمان سجينته
ايوه سبته
لما باعنى وعاش فى حيرته
جوا ألبومى دفنته
ومن سكات
قمت شلت الذكريات
جوة ضلمة فى الدولاب
زى قبر من العذاب
وخرجت من الاوضه
وقفلت تانى
جوا منىألف باب


بقـلم شهيرة


أختفاء الطبقة الوسطى

بنكافح بالطول والعرض
أحلامنا لا هى طالت سما
ولا عرفت تنزل ع الارض
أحنا بتوع الطبقة الوسطى
ملناش فى الكوسة ولا الوسطة
طبقة عمى وخالى وجارى
مواردهم ع الايد تتعد
ولا حدش قرب م السلطة
ولا لينا قرايب فى الشرطة
أحلامنا على قد القد
وان شطحت يتبنى ميت سد
أولادنا فى الجامعة أوائل
بيحلوا أجدعها مسائل
شايفين الدنيا بتفائل
لو يأسوا ولا ايد تتمد
لكن فى الزحمة وشوارعها
طبقتنا فقدت ملامحها
ونزلنا للطبقة الدنيا
والسور ال ما بينا أتهد
وبقينا أحنا ال غلابة
بنفرج همنا فى كتابة
لجل الطبقة تعود أيامها
نوصل تانى على أعتابها
و أهو حيلنا مقطوع م الشد

بقـلم شهيرة


نملة بتشكى لفار

الأزمة الاقتصادية عملت فينا أنهيار
وأدى عندك نملة واقفة تبكى وتشكى لفار
من سنة أخدوا فراخى وولعوا فى العشة نار
قولت اعمل زى غيرى من الناس الكبار
حولت انا كل حالى لشكاير من الخضار
وفرحت لما قالوا
على كل كيلو قوطة هديكوا اتنين خيار
وف لحظة راح خضارى حصل كلة طيورى
عملوا علية يا باشا قال اية شوربة خضار
بذمة دى تبقى أزمة ولا لعبة كبار
وبعيد كان جاى حمار
عمال يا هووة ينهق مالى الدنيا نهيق
مالك يا عم ميمو أية اسباب الزعيق
ضاع منة كل أكلة بيدور عل العليق
عمال يا ناس يعيط بليل وبنهار
أصل الازمة ال فاتت قطمت وسط الحمار
وهناك لقيت دة قرد ومعاة قرود كتار
مليين الدنيا ضحك مش عارفين بال صار
والنملة واقفة تبكى مش متحملة الهزار
ناديت يا عم قرد اية اخبار الخضار
قالى يا عم سيبك دة كلة كلام و وش
أنا عمرى ما شلت قرش
ولا حتى طلعلى كرش
عاوزنى اقلبها حيرة وندم واعيش فى نار
وأسئلهم فين خضارى يردوا بأعتذار
معلش يا عم قردخدة الغراب وطار
لا يا عم أبعد عنىمليش انا فى الخضار
لا عمرى كنت نملة
ولا هبقى فيوم حمااااااار

بقـلم شهيرة



أحلى الذكريات

مش عارفة لية تملى
بشتاق وغصب عنى
لحضن أبويا و أمى
وشبابيك بيتنا القديم
صوت الادان فى ودنى
وأبويا هناك وجدى
وأمى صاحية تصلى
شاكرة ربى الكريم
وأخويا كان يعدى
يرمى السلام و يدى
بوسة لامى على الجبين
وأختى واقفة تغنى
أغانى الست سومة
وساعات عبد الحليم
مش عارفة لية تملى
بشتاق والشوق غالبنى
لحضن أبويا وأمى
وحيطان بيتنا القديم
فى جنينتة كنا نجرى
وورودها الغالية نجنى
نضحك و الضحكة تروى
قلب أمى هناك بتدعى
يبعد عنا ال لائيم
يا بيت كتير بفكرى
كانت أفكار تاخدنى
و أقول أنا امتى أمشى
يبقالى بيت لوحدى
و أبعد عن التحكيم
بيتى الجديد عاجبنى
وفية حبيب شاغلنى
وكلمة ماما بتبعت لى
هوا زى النسيم
لكن أية ذنب قلبى
دايما مشتاق مخبى
بيفكر من سكات
سمعاة بيقول آهات
يا بيت أبويا و أمى
يا أحلى الذكريات

بقـلم شهيرة



زمن الكلاب

أهيم أطير ألف الدنيا دية و أدور
أقفل عيونى بالمسا و أصحى لما يجى النور
وكلمتى بتتسمع
اصلى بين الطيوركنت أنا المأمور
لكنى فجأة لقتنى فى القفص مأسور
وحلمت أبقى فى البحور سمكة
أصل حياة السمك علية كات لايقة
وشوفت جوا البحار الحلوة والعايقة
وفجأة بردة لقتنى مزنوق فى خيط شبكة
وحلمت ابقى وسط الخيول مهرة
ولية فى دنيا السبق شهرة
وكان اسمى عند الحبايب زهرة
لكنى لما كبرت قلبونى حمار سخرة
يا دنيا حتى الحلم فيكى عذاب
عشان أعيش لازم أكون كداب
ما الاصل فيكى نوعين والكل بقة منعاب
والاختيار بقة صعب يا قرود يا أما كلاب
وأسدك نايم هزيل ومشفنالوش أنياب
مهو قالوا فى الأمثال لكل شىء أسباب

بقـلم شهيرة



رسالة الى حبيبى

رسالة الى حبيبى
كنت بحاول أكون فى حياتك
حلم وحب كبير مش أكتر
كنت بموت فى اليوم مية مرة
على امل أنك يوم تتغير
لسة بحبك انا مش هنكر
لكن لاقية فى حبك ببنى
وأنت تهد ومرة تكسر
تكسر حلم جميل جوايا
وأنا بسكتلك و بقول هصبر
لكن الصبر بيهرب منى
شايف قلبى معاك أتدمر
أسأل قلبك وأنت لوحدك
لية ع البعد أنا قلبى هيقدر
أيوة حبيبى أنا عنك هبعد
يمكن تقدر مرة تفكر
لما تلاقى الحلم أتغير
وبينى وبينك مسافة بتكبر
وبيتنا العالى فجأة بيصغر
يمكن يومها حبيبى تقدر
وساعتها ع البعد ما هقدر

بقـلم شهيرة


أنا خايفة

أنا خايفة
أنا خايفة يا أمى خلاص
من قلمى وم الكلمة من الاحساس
ما انتى يا أمى عارفانى
أنا الكلمة بتحسسنى بكيانى
وبقدر بيها أعيش الدنيا من تانى
لكنى بكلمتى دية يا أمى بخاف
بخاف من نظرة جارحة فى عيون الناس
بخاف ورقى وأشعارى تتقطع فى يوم تنداس
بقينا فى دنيا محسوبة
وحتى السطر والكلمة لهم فيها يا أمى مقاس
أنا يا أمى مخنوقة
وكلمة ف حلقى مشنوقة
وهقفل تانى على قلمى بمية ترباس
خدينى يا أمى لأحضانك
أنا محتاجة لحنانك
أنا خايفة يا أمى خلاص
من الضلمة الساكنة فى عيون الناس

بقـلم شهيرة


قلبى أختفى

قلبى أختفى
ما بين ضلوعى مش حاسة بية
كلمة دفا
مش لاقية ليها معنى لية
حتى الوفا
فجأة انتهى راحت علية
لية جوا توابيت الزمن
مش لاقية غير البعد والكرة اتسكن
وعلى الشفايف ضحكة ماسخة بتترسم
جوايا فية شىء أتقسم
حتى العيون مبقتش واضحة
بين الرموش بتتسجن
لأ متلموش القلب لو راح واختفى
ما الحب عشش جوا حزنة
وقرر يندفن

أكمل قراءة بقية الموضوع...>>>

جروب شعر العامية المصرى على الفيس بوك

جروب شاعر الحب محمد عمر

جروب الشاعر د. وائل نبيل

شعر العامية المصري © 2009-2008 جميع الحقوق محفوظة تصميم وتطوير : امام سليم