الأحد، فبراير 22، 2009

اشتقنا ليكى يامصر

اشتقنا ليكى يا مصر وللبطالة
للكوسة والواسطة وللقرابة
وناس زى الارانب وناس شبه الديابة
وناس سايقة الشيطنة جوه الهبالة
والزبالة..
فيها دايما وجبة كاملة للغلابة
فيكى بولاق وابو العلا وامبابة
ومهندسين دقى ومدينة نصر يابا

**********
اشتقنا لورق فايدينا ناقصله ختم النسر
او دمغة عليها صورتك يابلدى ياغالية يامصر
وطلبات وظايف ماتت فى درج الأسر
وناس من غلبهم بيقولوا شعر ونثر
***********
اشتقنا يا مصر لرغيفك وللمسامير
وجنازة نمشيها ورا ضحية الطوابير
وفطار من عربية فول بس بالصراصير
وعلاج يموتنا بحجة التخدير
أتوبيسات زنقة والناس فيها عصير
والناس من الخيبة بيغنوا للحمير
وحكومة فقرتنا وتقوللنا تطوير
ورئيس من كتر القعدة جابلنا بواسير
************
اشتقنا ليكى يامصر وللسياحة
سياح على شطك كانه بيت الراحة
وبلاد فيكى مافيهاش غير الوقاحة
وبنات شغلتهم هى كل الصراحة
يعنى ياخواجة كل حاجة مباحة
بس هات العملة صعبة وبلدنا تبقى مرتاحة
والسباحة....
كل شعبك لازم يعرف يعوم
بعد الفساد ماغرقنا وبلّ الهدوم
وبقينا حالنا يسوء دايما كل يوم
واللى يسقيك حتى مّيه لازم تقوله يدوم
واللى هربوا بالقروض
واللى ياكلوا مشّ دود
واللى شاف بلدنا بتتنهب ومش قادر يزوم
****
اشتقنا ليكى يامصر وللروتين
وفوت علينا بكره ومش فاضين
او يافندى ماجوش الموظفين
واحنا هنلاحق مين ولا مين
بس اقولك ... عندى الحل المتين
افتح انت الدرج وحط ورقة بالخمسين
هتلاقى كرسى جالك وشاى ... وبالياسمين
وسعادتك ورقك هيخلص قبل غمضة عين
*********
اشتقنا ليكى يامصر للرحلات
والجامعه عاملة معسكر الاجازات
شباب ف اتوبيس ومعاهم اجمل بنات
طلبة وطالبات ومن كل الجهات
باجوش مارينا وكمان ابو تلات
وفى الخيام والدنيا ليل ناموا المشرفات
وف خيام تانية وتالتة حصلت حاجات
صحيح الطلبة مؤدبين بس للشيطان حركات
وياخوفى .. داللى جاى يغلب كل اللى فات
*********
اشتقنا ليكى يامصر للبروتين
لحمة قطط وكلاب حمير لكن مدبوحين
ويمكن تلاقى ختم الصحة المتين
اياك تقول حد راشى المسئولين
او تقول احنا ف شلة نصابين
دكاترة السلاخانة بس مش شايفين
هى الدبيحة حمار ولا جاموس عامل حمار
وللا اصلا هى فين ؟؟؟؟؟
*****
اشتقنا ليكى يا مصر وللعذاب
والكلاب.....
وسجون مقفولة ييجى بألف باب
وامين شرطة وكفه على قفا الطلاب
عشان متهورين
أو شوية مغرضين*
وحسب بيان السلطة شلة مأجورين*
أو عشان كاتب قال كلمة حق ف كتاب
او واحد رشح نفسه رئيس لما قالوا انتخاب
اوحتى واحد بس فكرنا بيوم الحساب
********
اشتقنا ليكى يامصر وللحريم
حلوين .....
عشان غصب عنهم وعننا
عاملين رجييييييم
عاقلين ....
عشان المرمطة والبهدلة خلت
العقل فى الجسم السليم
******
اشتقنا ليكى يامصر للاعياد
فلاح ماسك كاسيت ومشغّل فؤاد
مراجيح وبمب وناس من كل البلاد
وف الزحمة تاهوا ييجى اربع ولاد
تحت شجرة حسن بيحب ف سعاد
فجنينة تانية بنات مع اخواتها الولاد
فجنينة تالتة يمكن ابوها وصاحبتها وداد
************
اشتقنا ليكى يامصر وللمدارس
وعيال معاها مطاوى وبتشرب سبارس
لكن من عنيكوا عليهم ميت الف حارس
دول شباب المستقبل لبلاد اشجع فوارس
اما البنات فالأدب ... خلاهم عوانس
لابسين طقم تانى تحت طقم المدارس
هيزوّغوا ويفسحوا حبّة شباب بائس
********
اشتقنا ليكى يا مصر وللسلام
وكل وزير يسرق ياخد وسام
وكل اللى يبيع فيكى رافع الاعلام
وكل واحد يحكمك يقول كلام فى كلام
واللى عايز يعدلك يقول على نفسه السلام
*******
اشتقنا يامصر لشبابك وللتهـــييس
ومن كلام حكومتنا علموه التهجيص
واتعلم كمان يعنى ايه تفليس
اتعلم يصوم السنة عن اللحمة والبهاريز
صيام مالوش فطار بس فيه فوانيس
تنور بس للعريس وتقولله يحيا الرئيس
*************
اشتقنا ليكى يامصر وللشوارع
عربجى بحمار وعرقسوس ساقع
روبابيبكيا مين يشترى ... او حتى مين بايع
وواحدة تتقصع وواراها كام صايع
وعيال بكورة مهلهلة ولعبهم رائع
وناس تنادى ع المـيّه
ويبوسوا ايد الحنفيـّه
يمكن تنقـّطها شويـّه
ويحطوا طشت وكنكة وكمان بتاع واسع
وتيجى واحدة صحفـيّه
تعمل برامج فضائـيّـة
تناقش وزير الجمعيـّة
ويقول دى كدبة وهميّة والافترا شا ئع
وإن الوزير فبلدنا حقـّه من زمان ضايع
*******
اشتقنا ليكى يامصر عشان نضيع
والحق نشيل نقطة وتبقى نصيع
يابلد فيكى المسائل كلها تقطيع
وكل قضية فيكى لوحدها تشريع
حسب اللى سارق واللى نايب أو اللى ناوى يبيع
حتى اللى غــرّق ناسك عايش بدون توجيع
ياللى حالك مايل .... والظلم فيكى شنيع
والكل راضى وقابل ...... الباشا والوضيع
والكل الهمّ شـايل .... شييخ رااجل رضييع
والناس مش لاقيه تاكل .... بس القراءة للجميع
مالآخر مصر حاامل ... وقفللى عالمواضيع
***************
اشتقنا ليكى يامصر يامحافظات
أيوووه فاسكندرية
والشط والميّه
كرسى وشمسية
قعدة تحلّى الساعات.......
واشتقنا ليكى يامحافظات.......

رمسيس وعاشر والعتبة
مالزحمة تشغى وتستغبا
وناسها عايشة بمحبة
خناقة كل تلات خطوات.....
واشتقنا ليكى يامحافظات.......

فيها المانجة الطعم جميل
دى اسماعيلية فريق برازيل
بس الاهلى بلعب سئيل
يكسب ويعد الصفقات.....
واشتقنا ليكى يامحافظات.......

أسيوطى أسوانى وقناوى
شغّـيل وكمان مش غلباوى
صعيدى راجل .. مش حاوى
كلمته ولا ألف شيكات .......
واشتقنا ليكى يامحافظات.......

فى بورسعيد السعر خفيف
كنت تخين أو كنت نحيف
حميدى تجارى الللبس نضيف
وأبو العربى يحكى الحكايات ....
واشتقنا ليكى يامحافظات.......

وطنطا يعنى الغربية
مشبك وبسيمة طرية
حمص وجوز وسودانيّة
وسعيد والحلو وتاكسيات .....
واشتقنا ليكى يامحافظات.......

دمايطة والشهرة نجارة
والورش ماليالنا الحارة
والحرفة والسعر شطارة
بس مش كل الحماوات....
واشتقنا ليكى يامحافظات.......


فى المنصورة بنات قمرااات
جمال ربانى مش حركات
وكمان عائلات محترمات
واشتقنا ليكى يامحافظات..............

شراقوة دول ناس الكرم
سمعتهم اشهر مالهرم
عالقطر يوم لما اتعزم
واسالوا فى كل الروايات .........
واشتقنا ليكى يامحافظات.............

جروب شعر العامية المصرى على الفيس بوك

جروب شاعر الحب محمد عمر

جروب الشاعر د. وائل نبيل

شعر العامية المصري © 2009-2008 جميع الحقوق محفوظة تصميم وتطوير : امام سليم