شاطر حسن وست الحسن
شاطر حسن واد معجباني جميل
وعنه في الجدعنة نحكي ونقول مواويل
بس الأكاده بأه أن مخه تخين
ولو القيامة تقوم بارد وباله طويل
وست الحسن حلوه وشعرها سايب
ويا عيني متعلقة بحبل الهوا الدايب
وفي قصرها قاعده علي البر التاني
تغني من لوعتها وتقوله اه ياني
تهندم نفسها وتربط علي شعرها المنديل
وتمشي تتمخطر قصاده وخصرها بيميل
أنا اللي طول العمر قلبي ما مال
كانوا الملوك يترموا تحتي يمين وشمال
شاطر حسن يا خالي البال
دي البنت حالها عجب وانت حالك عال
شاطر لكنه غشيم في الحب مابيفهمش
ومهما قلبها بيدق هو ما بيسمعش
وقالوا ياما عنه انه مايستاهلش
وهي قلبها دليلها وقلبها ما يكدبش
ساذجه يا ست الحسن زماننا غش في غش
ياميت ندامه علي اللي كان زمان شاطر
وكان الكلام يفهمه لو في الهوا طاير
اه يا ست الحسن والدنيا اتقلب حالها
حكايتكوا متشقلبه ومتبدله الأدوار
التقل صنعه ماشي بس كتره يضر
والصبر طيب بس طعمه مر
شاطر حسن مستني ايه يا خطير
اه يا زمان العبر
زمن الشطاره جبر
واتجدعنوا الفرافير