دنيا شقلباظ

الكل بيغنى على ليلاه
واللى بيقول يا اهى اه
واللى عامل حكاية
واللى راقد فى العناية
واللى واقف فى مكانه
واللى عمال لسة يجرى
وكله كله بيلعب شقلباظ
واللى صلح اللى باظ
والحمام الشقلباظ
نتفوا ريشة بقى شبه الازاز
والحديد اللى انصهر
والقلب اللى انكوى
واللى مقضيها سهر
واللى وقع فى الهوا
ومجانين داخلين يتعالجوا
وعاقلين فاكرين فى ايديهم الدوا
واللى صاحى وقاعد مع دة ودة
واللى بيقول مينفعش خلاص كدة
واللى نام من بدرى وراضى اخر رضا
.. واللى صلى الفجر حاضر
واللى لسة بيعمل محاضر
واللى سقف على اللى شاطر
واللى لسة بكرة ناطر
نقوله بالهنا والشفا
قوم يا عم
ارمى الهم
الا لو قابلك صوان
خش عزى
واعمل الواجب تمام
دنيا هى
ماشية بينا
يوم معانا
ويم علينا
وباردو مش عارف تنام
حبة حبة
راح تلقى حبة امان
مين سليم فى الدنيا ديا
مين اللى ما فى يوم اشتكى
بت سمرا بت بيضا
سامية كانت او تفيدة
تتضحك وفى ديل الفرح البكى
ستات وفاضية
وراجلتهم مطحونين
بلا نيلة
دة كل واحد محتاج حبتين
حبة بيضا وحبة زرقا
يا نهار ابيض ليلتنا زرقة
والستات دول غلبانين
واللى حامل
واللى بتعزف بالانامل
واللى عامل نفسه له الف عين
حاجات كتير وناس كتير
فرحانين وشماتنين
دنيا هى نط نط
يا بخت اللى عقله شط
واللى قاعد بيحلم بشط
واللى من مكانه فط
والى يطلع لسانه
واللى يغيظ ويشطشط
دنيا هى شقلباظ
بلياتشوا لون خدوده
واللى عدا حدوده
واللى بيخلد جدوده
واللى قتل قتيله
واللى ولع فتيله
واللى ساحب الواد فى ديلة
قوم يا اخويا
قوم يا ابويا
شيل الهم يالا شيل



اما شوية مجانين